A cativada de Vimianzo recrea a loita irmadiña cun asaltiño pasado por auga
O Asalto ao Castelo é unha festa declarada de interese turístico de Galicia
Os fachos volverán prenderse en Vimianzo para iluminar un novo asalto ao castelo, unha festa con ADN irmandiño que nos devolve aos tempos da Baixa Idade Media, cando o pobo se rebelou contra os señores feudais.
Na tarde deste domingo asistimos ao prólogo do que acontecerá pouco antes da medianoite, cun asaltiño infantil pasado por auga.
O ataque produciuse ao berro de "lume", pero non ardeu nada, máis ben o contrario. A versión cativa da loita irmandiña foi, sobre todo, unha festa da auga de molladura tan inevitable como benvida, porque os termómetros superaban os trinta graos.
O asaltiño faise en familia. É diversión sen límite de idade e en estado puro, pero tamén unha mirada orgullosa cara a historia e o pasado medieval de Vimianzo, cando os vasalos, fartos dos abusos dos nobres, se alzaron en armas contra os Moscoso.
A escenificación do asalto ao castelo é o momento máis agardado dunha festa que continúa o domingo, con visitas guiadas e teatralizas á fortaleza vimiancesa.
