A feira do forestal, Galiforest, pecha en Sergude con máis de nove mil visitantes
Máis dun cento de expositores presentaron as últimas innovacións tecnolóxicas, ambientais e produtivas no sector da madeira
O gañador do concurso de innovación foi un guindastre robotizado dunha empresa galega
Nin os 37 graos que acadaron en Sergude, no concello de Boqueixón preto de Santiago de Compostela, o lugar onde se celebraba o Galiforest, evitou que milleiros de persoas se achegaran a desfrutar por oitavo ano da feira do sector forestal de Galicia.
"Todos os 125 expositores directos a metade son de Galicia, pero a outra metade non o é, o que significa que esta feira é de referencia para toda España e cada vez máis de fóra, cun doce por cento de expositores internacionais. Conseguimos que Galicia sexa protagonista", expón Ricardo Durán, director xeral da Fundación Semana Verde de Galicia.
O evento que comezou o xoves pasado pero este sábado os visitantes tiñan postos os ollos no concurso de innovación, onde 18 proxectos competían pola solución máis innovadora no seu campo. E un guindastre robótico e intelixente dunha empresa de Vila de Cruces gañou o premio.
"O que quixemos foi simplificar o guindastre e no canto de movelo eixo a eixo, coa súa complexidade, deseñamos un sistema que o mova dun xeito máis sinxelo", comenta Víctor Pinto, director xeral de Industrias Guerra (Vila de Cruces) sobre a máquina que presentaron e coa que gañaron o galardón.
Tamén recibiron mencións especiais un procesador de madeira automatizado, un proxecto de aproveitamento de codia de eucalipto e mesmo un dedicado ao control informatizado da maquinaria.
"É un control de frotas, simplificándoo. É un control sobre o condutor: canto tempo bota parado, canto arrincado e canto bota traballando", describe Daniel Facorro da empresa Forest Pioneer.
Máis dun cento de expositores de oito países, a metade deles procedentes de Galicia, e unhas duascentas demostracións de maquinaria fixeron as delicias dos visitantes. Galiforest pecha as súas portas cun futuro do sector forestal marcado pola innovación, a automatización e o medio ambiente de cara aos os vindeiros anos.
