Heredeiros da Crus suspende concertos pola enfermidade do seu cantante, Javi Maneiro
A banda comunicou a suspensión da xira, pero sinala que "Javi se atopa ben e está desexando volver subir aos escenarios"
Foron a grande ausencia do Festival da luz desta fin de semana. Heredeiros da Crus estaban no cartel, pero tiveron que anular ese concerto. O mesmo vai pasar co de hoxe en Ferrol e todos os demais ata novo aviso.
O seu cantante, Javi Maneiro, está ingresado por un problema de saúde grave do que se recupera nestes momentos favorablemente.
A banda, nun comunicado en Facebook, informaba hai uns días da suspensión da xira. Hai unhas horas, nun novo comunicado sinalaba que "Javi Maneiro estase a recuperar dun problema de saúde. A mensaxe que vos queremos transmitir é que total optimismo e tranquilidade. Javi atópase ben e está desexando volver subir aos escenarios e agradece todo o cariño e amor que está recibindo pola vosa parte".
