Publicador de contidos

Publicador de contidos

Habilitan dúas vías alternativas para os veciños de San Vicente de Leira

Habilitan dúas vías alternativas para os veciños de San Vicente de Leira

Levaban 24 horas incomunicados polo derrubamento dunha ponte na OU-0807

A Confederación Hidrográfica habilitou unha estrada local e a Deputación unha pista forestal para darlles servizo aos veciños

Os avisos por chuvia e vento sucederanse ata o mércores

G24.gal 16/11/2026 14:52

Contra o mediodía do domingo, a ponte de Baxeles colapsaba, deixando incomunicados a vintena de veciños que residen en San Vicente de Leira, a aldea de Vilamartín arrasada polos incendios de 2025.

"Isto é consecuencia dos incendios. De non ter feito as cousas hai un ano", lamenta unha veciña.

Interrompido o tráfico pola estrada provincial, a única alternativa era unha estrada local, a do Mazo, afectada tamén pola riada, que a deixou intransitable de leña e lama.

"Está atrancada polas chuvias e non poden saír. Levan 24 horas encerrados, e son persoas maiores", sinala outra veciña.

A Confederación Hidrográfica ocupouse da limpeza da estrada do Mazo e a Deputación de habilitar para o tránsito de turismos unha pista forestal, de maneira que haxa dúas vías alternativas para os veciños.

Luis Menor, presidente da Deputación Provincial de Ourense: "Estamos desde o primeiro minuto na vía garantindo a seguridade, actuando para restablecer a vía dentro do ámbito das nosas competencias e colaborando coas outras administracións para ter atendida a poboación".

Atribúen o colapso da ponte ao dano dos incendios combinado cos restos das cortas e cunha drenaxe insuficiente das estradas.

Marta Docampo, directora de Infraestruturas da Deputación: "Imaxinai unha presa que non é presa aguantando todo ese empuxe de auga. Acabou rebentando a estrada".

Anunciaron que van executar a reparación da estrada derrubada por vía de urxencia para axilizar as obras.

 

Publicidade
Publicidade
Publicidade
Publicidade