Galicia logra 118 praias con bandeira azul, dez máis que en 2025

Galicia é este 2026 a terceira comunidade autónoma con máis bandeiras azuis, con 118 praias en 38 concellos, dez máis que o ano pasado, distinguidas pola súa calidade da auga, accesibilidade e seguridade, mentres que Sanxenxo mantense como o municipio español con máis galardóns (21).

España volve liderar en 2026 a clasificación mundial de bandeiras azuis, con 677 praias galardoadas, 35 máis ca o ano anterior, o que supón o mellor resultado desde o inicio desta iniciativa en 1987.

Os 118 areais distinguidos

Na provincia da Coruña obteñen este recoñecemento os areais de 38 concellos: a das Lapas, Orzán-Matadoiro, Oza, Riazor, e San Amaro, na Coruña; a de Caión, na Laracha; a de Lombiña-Cabío, na Pobra do Caramiñal; as da Salsa (Repibelo), Barrañán, Combouzas, Porto de Suevos, Sabón e Valcobo, en Arteixo; a do Lago das Pontes, nas Pontes de García Rodríguez; a de Gandarío, en Bergondo; a de Arou, en Camariñas; as Pedra do Sal, Razo, e Saíñas, en Carballo; a do Ézaro, en Dumbría; as da Fragata-O Pareixal, Caranza, Doniños, Esmelle, Ponzos (que a recupera), e San Xurxo, en Ferrol; a de Laxe, en Laxe; a de Area Maior, en Malpica; as da Ribeira, Grande e Perbes-Andahío, en Miño; a de San Francisco, en Muros; as de Bastiagueiro, Espiñeiro, Mera, Naval, e Santa Cristina, en Oleiros; as da Concha e Morouzos (que as recuperan), en Ortigueira; as da Ermida, Balarés, Niñóns (nova), e O Osmo, en Ponteceso; e a de Coroso (que a recupera) en Ribeira.

Na provincia de Lugo as que logran a bandeira azul son: as do Coto, Fontela Balea, e Pasadas (que a recupera), en Barreiros; as da Marosa e O Portelo, en Burela; a do Torno, en Cervo; as da Rapadoira, Areoura, As Polas, Llas e Peizás, en Foz; as de Abrela e Xilloi, no Vicedo; as das Catedrais e Os Castros-Llas, en Ribadeo; a de Area, en Viveiro; e a de Esteiro, en Xove.

Na provincia de Ourense, logra este indicador a praia dos Franceses, na Veiga (nova).

E na provincia de Pontevedra, as de Area Grande e O Muíño, na Guarda; as de Area da Secada e o Bao (Camaxe), na Illa de Arousa; as de Barbeira, A Cuncheira, Frades, Ladeira, Ribeira e Santa Marta, en Baiona; as de Area de Bon, Lagos, Lapamán e Portomaior, en Bueu; as de Aguete, Loira (que a recupera), Mogor, Portocelo, e Santo de Mar-A Coviña, en Marín; a do Con, en Moaña; as de Cabeceira, O Laño (nova), e Xiorto, en Poio; a Praia Fluvial da Calzada, en Ponte Caldelas; as da Lapa, Agra, Areas, Areas Gordas, Baltar, Bascuas, Canelas, Caneliñas, Foxos, Major, Montalvo, Nosa Señora da Lanzada, O Espiñeiro-A Lanzada, Pampaído (nova), A Panadeira, Paxariñas, Pragueria e Silgar, en Sanxenxo; as da Argazada, A Fontaiña, A Punta, Rodas (Illas Cíes), Canido, Carril, O Adro, O Fortiñón, O Mende, O Vao, Santa Baia e Tombo do Gato, en Vigo; e as do Campanario-Bamio e Compostela, en Vilagarcía de Arousa.

Por comunidades autónomas, a Comunidade Valenciana mantén o seu liderado con 151 bandeiras; séguena Andalucía, con 143; Galicia, con 118; e Cataluña, con 101. Tamén destacan Canarias, con 52 distintivos; Baleares e a Rexión de Murcia, con 33 cada unha; Asturias, con 16; Cantabria, con 11, e Estremadura, con 8. 

Portos deportivos

O programa tamén distingue a portos deportivos e Galicia conta con 11 distincións.

Seis están en Pontevedra: o Liceo Marítimo de Bouzas en Vigo, o Monte Real Club de Iates en Baiona, o Porto Deportivo Pedras Negras no Grove, e o Club Náutico de Portonovo, o Porto Deportivo Xoán Carlos I e Real Club Náutico de Sanxenxo en Sanxenxo.

Hai outros catro na Coruña: o Club Náutico de Sada, o Porto Deportivo Sadamar, en Sada; o Real Club Náutico da Coruña–Mariña Real, na Coruña, e o Real Club Náutico de Portosín no Porto de Son.

E un na provincia de Lugo: o Porto Deportivo de Ribadeo.

O Porto Deportivo de Cangas perdeu a súa distinción este ano.