Galicia é a única comunidade autónoma en alerta amarela por chuvia

Galicia é a única comunidade autónoma que está este domingo en alerta amarela por chuvias nalgunhas áreas das provincias da Coruña e Pontevedra, segundo sinalou a Axencia Estatal de Meteoroloxía (Aemet). O aviso amarelo significa que hai risco para a realización de certas actividades

Na súa web, o citado organismo avisou de que existe, ata as 15:00 horas na península (13:00 horas GMT) unha probabilidade de entre un 40% e un 70% de que en áreas do oeste e do suroeste da Coruña se dean precipitacións de 15 litros por metro cadrado nunha hora.

En Pontevedra, ata as 16:00 horas na península (14:00 horas GMT), tamén se contempla a probabilidade de entre un 40% e un 70% nas Rías Baixas e na zona do Miño, ambas na provincia de Pontevedra, de que se dean precipitacións de 15 litros por metro cadrado por hora, segundo a axencia.

A Aemet, na súa predición xeral para hoxe, estimou que a xornada estará marcada polo paso dunha fronte atlántica que deixará ceos moi nubrados na maior parte da península á vez que se agandan precipitacións na costa galega e refachos moi fortes de ventos en zonas altas da cordilleira Cantábrica.

Ademais do aviso de precipitacións fortes ou persistentes nalgúns lugares da costa de Galicia, tamén se prevén ventos que poden ser fortes no litoral galego.

Na fronte atlántica a axencia estatal alerta de que haberá un predominio dos intervalos de nubes medias e altas nos terzos sur e leste da península así como nas Baleares, e daranse precipitacións na maior parte da metade noroeste, aínda que serán máis abundantes e con tormentas en Galicia, especialmente nos litorais atlánticos.

Imaxe do mapa de alerta de AEMET para o domingo 19 de outubro

Para este luns, segundo as previsións da Aemet, o tempo vai empeorar na costa de Galicia. O aviso amarelo no mar amplíase a toda a costa de Galicia: desde a Mariña de Lugo ata o sur da provincia de Pontevedra.

Imaxe do mapa de previsións da AEMET para este luns 20 de outubro