Galicia é a segunda comunidade con máis acollemento familiar, e a Xunta avoga por mellorar

A conselleira de Política Social, Fabiola García, destacou este martes que Galicia é a segunda comunidade autónoma con mellores cocientes de acollemento familiar e avogou por continuar nesta liña para conseguir a “desinstitucionalización de todos os nenos que, desgraciadamente, non poden vivir coas súas familias”.

Máis dun 60 % dos menores que están no sistema de protección viven cunha familia de forma temporal.

Así o sinalou a titular de Política Social na inauguración do Congreso Internacional de Acollemento que organizan a Xunta e Aldeas Infantís no que reivindicou esta fórmula que busca dar refuxio aos nenos e adolescentes en situación de desprotección social.

Neste sentido, García celebrou que a capital galega acolla este congreso no que “expertos a nivel internacional dirannos cales son as claves para seguir potenciando o acollemento familiar”.

Segundo reivindicou, este logro débese á aposta da Xunta nesta materia xa que a administración autonómica mellorou o apoio económico que reciben as familias acolledoras para favorecer este paso.

Desde maio deste 2025, incrementáronse as axudas que perciben mensualmente as familias acolledoras e que agora se sitúan en 425 euros ao mes para os que acollan a nenos maiores dun ano mentres que para os de menos desta idade a cantidade é de 600 euros.

García tamén reivindicou as campañas postas en marcha para dar a coñecer este sistema mediante o que as familias buscan “darlle unha mellor calidade de vida a todos estes nenos e nenas”.

“Isto non consiste en casas con paredes, senón en familias con brazos”, resumiu a conselleira.