Desarticulan unha banda que distribuía cocaína en Santiago e outros puntos de Galicia, con catro detidos

A Policía Nacional desarticulou unha organización que distribuía cocaína en varios puntos de Galicia. Segundo informou nun comunicado, foron aprehendidos máis de dous quilos desta substancia en Santiago de Compostela e hai catro persoas detidas.

Así, axentes da Policía Nacional iniciaron a tarde do día 6 de xaneiro a intervención no marco da operación policial Pantera Rosa Magnum, que finalizou coa detención de catro membros dunha rede (dous homes e dúas mulleres) por supostos delitos contra a saúde pública, branqueo de capitais e pertenza a organización criminal.

Os dispositivos activados permitiron centrar a investigación nun chanzo superior e identificar un home que lideraba a organización e fornecía de cocaína varios puntos de venda a pequena escala do ensanche compostelán e a súa área de influencia, e que tamén frecuentaba periodicamente co mesmo fin outras zonas das provincias da Coruña e Lugo.

O investigado, segundo o relato policial, tomaba moitas medidas de seguridade, polo que se trasladaba alternativamente en vehículo particular ou en transporte público, para tentar así evitar ser detectado.

Finalmente, tras múltiples vixilancias e seguimentos durante meses, puidéronse localizar os lugares onde se presumía que podía ter almacenada a droga, polo que se elaborou un dispositivo no que colaboraron diferentes unidades da Policía Nacional.

O día da detención, foi interceptado nun vehículo acompañado por unha muller, tamén detida, do que se lle requisou nun compartimento oculto no motor uns 350 gramos de cocaína.

Con este operativo considérase desartellada esta estrutura, que distribuía cocaína en toda a área da capital galega, tras realizarse na Coruña e Santiago de Compostela un total de cinco rexistros en domicilios, rochos e locais.

Outras dúas persoas máis son detidas pola venda de substancias estupefacientes nun domicilio utilizado como punto negro en Santiago, e por facilitar o branqueo das ganancias produto das vendas.

A cantidade total comisada na operación é de máis de 2.000 gramos de cocaína, e incautáronse ademais de catro básculas de pesada, diñeiro e diversos útiles utilizados para a manipulación e o envasado da devandita substancia.

As investigacións foron realizadas pola Brigada Local de Policía Xudicial, Grupo de Estupefacientes da Comisaría Local de Santiago de Compostela, en investigación conxunta co Grupo de Estupefacientes da Brigada de Policía Xudicial da Comisaría Provincial de Lugo, contando coa colaboración operativa da Brigada de Seguridade Cidadá de Santiago de Compostela.

O suposto líder da organización criminal foi enviado a prisión polo Xulgado de Instrución de Garda de Santiago.