Galicia dá por controlados todos os incendios forestais no seu territorio
Os incendios de Ourol, Taboada e Monfero calcinaron en total 100 hectáreas
Terreo calcinado en Monfero. TVG.
A Consellería do Medio Rural deu por controlado no mediodía deste xoves o incendio que comezou este mércores no municipio lucense de Ourol, na Mariña, o mesmo que xa o fixera nas últimas horas co de Taboada, na zona sur de Lugo, e Monfero, na Coruña, que afecta parcialmente o Concello de Guitiriz,en Lugo.
O lume de Ourol queimou 30 hectáreas
Segundo a información de Medio Rural, que só inclúe os focos que alcanzan polo menos 20 hectáreas ou afectan a espazos protexidos, ás 13:36 deste xoves quedou controlado o lume rexistrado no municipio de Ourol, na parroquia de Merille, que queimou unhas 30 hectáreas.
O lume comezou este mércores ás 13:35 horas e para a súa extinción foron mobilizados 2 técnicos, 8 axentes, 17 brigadas, 16 motobombas, 3 escavadoras, 3 helicópteros e 2 avións.
O de Taboada queimou 40 hectáreas e o de Monfero 30
O incendio de Taboada, que comezou ás 16:44 horas do martes na parroquia de Insua, está controlado desde onte ás 19:31 horas, despois de arrasar unha superficie de 40 hectáreas.
Para extinguir ese incendio foron mobilizados cinco técnicos, 16 axentes, 31 brigadas, 23 motobombas, 3 escavadoras, 8 helicópteros e 6 avións.
En canto ao incendio de Monfero, que comezou onte ás 14:26 horas na parroquia de Alto de Xestoso, quedou controlado ás 22:22 horas. Segundo as estimacións provisionais afecta unha superficie de 30 hectáreas, parte dela no municipio veciño de Guitiriz (Lugo).
Foron mobilizados para a súa extinción 1 técnico, 15 axentes, 18 brigadas, 12 motobombas, 2 escavadoras, 4 helicópteros e 4 avións.
