Francia expulsará diplomáticos de Alxeria, coa relación entre os dous países "totalmente bloqueada"

O ministro francés de Exteriores, Jean-Noël Barrot, avanzou que o seu país vai expulsar a diplomáticos alxerinos, en resposta á quincena de funcionarios franceses para os que Alxeria anunciou a expulsión, e considera que a relación entre os dous países está "totalmente bloqueada".

Nunha intervención este mércores na canle BFMTV, Barrot confirmou que "serán expulsados diplomáticos alxerinos como resposta" a unha decisión "inxustificada e inxustificable".

Referíase á información que filtrou a axencia oficial alxerina APS, que indicou que o Ministerio de Exteriores dese país notificara este domingo ao encargado de negocios da Embaixada francesa (o embaixador está en París, chamado a consultas polas autoridades francesas) a expulsión inmediata dun grupo dos seus funcionarios

A razón aducida é que se constatou que polo menos quince deles asumiran funcións diplomáticas ou consulares sen que houbese previamente notificacións oficiais ou "solicitudes de acreditación apropiadas, segundo esíxeno os procedementos vixentes".

Para Barrot, o que sae perdendo con esas expulsións é "o pobo alxerino".

O xefe da diplomacia francesa viaxou a Alxer pasado 6 de abril para tratar de pasar páxina aos repetidos desencontros entre os dous países dos últimos meses e tras ser recibido polo presidente, Abdelmadjid Tebboune, mesmo anticipou un restablecemento da cooperación en múltiples aspectos.

Pero todo veu abaixo tras a detención en Francia dous días despois dun axente consular en París, acusado de participar no secuestro en abril de 2024 de Amir Boukhors, un opositor ao réxime alxerino refuxiado en Francia.

Iso conduciu a Alxeria a expulsar a doce funcionarios franceses e París replicou cunha medida equivalente.

Este mércores o ministro francés de Exteriores pediu "responsabilidade ás autoridades alxerinas" e tamén "un xesto de humanidade" en dirección do escritor franco-alxerino Boualem Sansal, encarcerado en Alxeria, onde foi condenado a cinco anos de prisión por unhas declaracións nas que cuestionaba a soberanía de Alxeria sobre unha parte do seu territorio.

As relacións entre Alxeria e Francia, antiga potencia colonial ata 1962 ao termo dunha cruenta guerra de independencia, deterioráronse notablemente desde o pasado verán, cunha sucesión de desencontros en cadea.

O causante foi que a finais de xullo, o presidente francés, Emmanuel Macron aliñouse totalmente coa posición marroquí sobre o Sáhara Occidental (descartando a posibilidade dun referendo de independencia para a antiga colonia española), o que deu lugar como resposta de Alxeria, principal soporte da Fronte Polisario, á retirada inmediata do seu embaixador en París.