A Xustiza arxentina solicita aos EUA a extradición de Maduro por crimes de lesa humanidade

O xuíz federal arxentino Sebastián Ramos solicitou este mércores a extradición de Nicolás Maduro desde Estados Unidos á Arxentina, por unha causa que se tramita nos tribunais do país suramericano e en que se acusa o mandatario de crimes de lesa humanidade cometidos en Venezuela.

O caso aberto contra Maduro na Arxentina iniciouse en 2023 por unha denuncia presentada polo Foro Arxentino para a Defensa da Democracia (FADD) e baseada no principio de xurisdición universal, que permite aos países procesar graves delitos contra os dereitos humanos independentemente de onde se cometeron e da nacionalidade dos responsables ou as súas vítimas.

O maxistrado ordenou librar un exhorto internacional aos Estados Unidos de América, a efectos de solicitar a extradición de Nicolás Maduro Moros, capturado recentemente en Venezuela e encarcerado nos Estados Unidos.

O xuíz Ramos, que baseou a súa petición deste luns no tratado de extradición que A Arxentina mantén con Estados Unidos, xa ordenou en setembro de 2024 a detención de Maduro así como tamén do ministro do Interior venezolano, Diosdado Cabello, e outros membros do Gobierno dese país.

A Cámara Federal considerou entón que a cúpula do Goberno venezolano executou "un plan sistemático, ao longo do tempo e de maneira organizada" en contra da poboación civil do país caribeño mediante prácticas de "persecución, secuestro, tortura e asasinato".

Agora, ante a captura de Maduro por parte de Estados Unidos o pasado 3 de xaneiro, o fiscal Carlos Stornelli solicitou ao xuíz, dous días despois, "que se inicie, por tanto, o procedemento de extradición activa respecto de Nicolás Maduro Moros, co fin de que sexa sometido ao presente proceso".