Rexistran os locais de X en Francia e convocan a Elon Musk para ser interrogado

As autoridades francesas rexistraron este martes os locais da rede social estadounidense X e convocaron ao seu propietario, Elon Musk, a comparecer ante a Xustiza para un interrogatorio, anunciou a Fiscalía gala nun comunicado.

"Levouse a cabo un rexistro (...) por parte da sección de loita contra a ciberdelincuencia da Fiscalía de París, xunto coa unidade nacional cíber da Xendarmería e Europol, no marco da investigación aberta en xaneiro de 2025", anunciou a Fiscalía, que precisou ademais que deixará de publicar nesa rede social. 

A investigación, en mans da Dirección Xeral da Xendarmería (Policía) Nacional, prodúcese tras a recepción de dúas denuncias, o 12 de xaneiro de 2025 e o 9 de xullo de 2025.

A investigación ampliouse tras outras denuncias que sinalaban o funcionamento do modelo de Intelixencia Artificial de Grok na plataforma X, que provocaría "a difusión de contidos negacionistas e deepfakes de carácter sexual".

Entre os cargos penais que se investigan, a Fiscalía citou o de "complicidade na posesión de imaxes de menores de carácter pedopornográfico", "atentado contra a representación da persoa (deepfakes) de carácter sexual", "extracción fraudulenta de datos dun sistema de tratamento automatizado de datos, en banda organizada" e o de manipulación de algoritmos ou sistemas informáticos.

A Fiscalía aclarou que decidiu convocar os responsables da plataforma X, entre eles a Musk, a través da figura legal do "interrogatorio libre" que permite comparecer ante a Xustiza sen estar detido.

Trátase dun paso procesual formal para saber se finalmente se imputa o oligarca formalmente. Para non acudir a este tipo de "interrogatorio libre" é necesario presentar unha xustificación válida.

A convocatoria de Musk está fixada para o próximo 20 de abril, a mesma data en que debería presentarse Linda Yaccarino, directora executiva de X.