Fornada tradicional en Niñodaguia para poñer en valor a súa olería

A parroquia de Niñodaguia, en Xunqueira de Espadanedo, viaxa ao pasado para celebrar a súa Fornada Tradicional. Para elo, volve este sábado a comezos do século XX.

A xornada festiva quere poñer o valor a olería tradicional de Niñodaguia, unha parroquia orgullosa dunha materia prima especial, o barro que custodia o Monte do barro, e que é a base dunha olería singular: o “barro amarelo” que diferencia estes “cacharros” doutras olerías.

Logo da inauguración chegou a procesión das 'apañadeiras', mulleres que conducen sobre as súas cabezas o froito dos cacharreiros: ondas, canecos, fontes, barreñóns, son conducidos aos fornos onde, meticulosamente colocados polos homes e coma se dun tetris se tratase, organízanse os distintos cacharros nos vellos fornos de pedra.

Este espectáculo é acompañado de música tradicional nun fiadeiro onde se dan cita algúns dos mellores grupos tradicionais da provincia, tamén un pequeno obradoiro de baile e visita guiada ao Museo de Niñodaguia.