Fiscalía pide 25 anos de prisión para o acusado de matar a súa exparella en Ribeira

Fiscalía solicita 25 anos de cárcere para o home acusado de matar, en marzo do ano pasado, a súa exparella en Palmeira, no municipio coruñés de Ribeira.

Así o recolle o escrito fiscal, que expón unha petición de 22 anos de cárcere por un delito de asasinato, así como privación da patria potestade e prohibición de aproximarse a familiares da vítima durante 28 anos.

A esta petición, con solicitude de indemnizacións, suma tres anos de cárcere por un delito de violencia habitual, engadindo outros dez anos de prohibición para achegarse a familiares.

Os feitos ocorreron o 19 de marzo do ano pasado, na vivenda onde residía a muller, Andrea Yturri, de 25 anos, que levaba un tempo separada do presunto agresor. O home acoitelou, segundo fiscalía, a vítima na casa e, posteriormente, feriuse a si mesmo, polo que tivo que permanecer ingresado no hospital. Ambos tiñan un fillo en común de pouca idade, que nese momento non estaba na vivenda.

No seu escrito, o Ministerio Público precisa que o acusado, con condenas previas por ameazas leves de violencia de xénero, exerceu sobre a vítima, desde o inicio da relación e tras a súa finalización, distintas formas de control sobre a falecida, empregando contra ela expresións como "mala nai" ou "non vales para nada".

Tras a ruptura, chamábaa e enviáballe mensaxes a diario. O día dos feitos, engade, recolleu o seu fillo na escola infantil e deixouno coa súa irmá para logo dirixirse ao piso onde vivía a vítima. Unha vez no interior, o acusado "atacouna de forma inesperada e repentina" sen capacidade de defensa, engade o Ministerio Público, que ten en conta a agravante de parentesco.