Ferido un mozo na cara nunha pelexa tumultuosa no centro de Ribadeo

Na rúa Vilalba, no centro de Ribadeo, un mozo quedou ferido nunha pelexa con numerosos participantes. Ao parecer, a vítima perdeu varias pezas dentais, polo que precisou asistencia médica.

Trátase do segundo suceso destas características que se dá na mesma zona no que vai de mes. Hai quince días, a outro mozo arrincáronlle parte dun labio dunha dentada.

Neste último altercado, os coches estacionados na rúa tamén sufriron danos. Tras a pelexa, algúns dos vehículos apareceron cos retrovisores rotos.

Tamén de madrugada e no centro de Ribadeo, foi asaltada unha tenda de viños. Para accederen ao local, os ladróns romperon unha das cristaleiras, e posteriormente tamén estragaron a caixa. A Garda Civil está a investigar a autoría do roubo.