Ferida unha persoa tras un incendio nunha vivenda en Cerdido

Unha persoa tivo que ser trasladada ao resultar ferida tras declararse un incendio nunha vivenda unifamiliar situada en Ulfe de Malados, na parroquia da Barqueira, en Cerdido.

Segundo a información do 112 Galicia, o suceso produciuse sobre as 3:40 horas deste martes, e foi un particular o que alertou dun incendio na cociña da planta baixa do inmoble.

Ademais, durante a súa comunicación indicou que as persoas que se atopaban no interior estaban na planta superior e non podían saír.

Ante isto, a central de emerxencias informou o Servizo de Urxencias Sanitarias de Galicia-061, os Bombeiros do Eume, o Ges de Murgardos, a Garda Civil, o Concello e os servizos contra incendios forestais da zona, que se desprazaron cunha motobomba cada un.

Unha vez no punto, os equipos de emerxencias rescataron as persoas atrapadas e controlaron o incendio, que causou importantes danos materiais e deixou a vivenda practicamente afectada na súa totalidade.

Pola súa banda, os profesionais sanitarios trasladaron unha persoa que resultou ferida ao centro hospitalario de referencia.