Falece un traballador logo de caer do tellado dun instituto na Coruña

Un home faleceu este luns cando estaba traballando na Coruña, ao caer dun tellado. 

O falecido traballaba na cuberta do IES Agra do Orzán, situado na rúa do Alcalde Liaño Flores, cando caeu desde varios metros de altura. Foi o persoal de Urxencias Sanitarias de Galicia-061 o que alertou o 112 Galicia, minutos antes das 18 horas.

Desde o Centro Integrado de Atención ás Emerxencias activouse de inmediato un operativo no que tamén colaboraron os axentes da Policía Nacional.

Unha vez no lugar, os profesionais sanitarios só puideron confirmar o falecemento do traballador.

🔴#AXEGAInforma dun traballador que perdeu a vida na Coruña.

📍 Rúa do Alcalde Liaño Flores.

▶️ A vítima caeu desde o tellado dun instituto no que estaba traballando.

🔗 https://t.co/bOROU0Ka1u pic.twitter.com/bsubeCyiXS

— 112 Galicia (@112Galicia) March 16, 2026

Fontes da Policía Nacional ratificaron que se investigan as causas do accidente laboral. O que se coñece é que o traballador estaba a realizar tarefas de limpeza no tellado cando se derrubou a superficie en que se atopaba apoiado, o que provocou a caída.

Fontes da Consellería de Educación trasladaron as condolencias á familia da persoa falecida e á comunidade educativa do instituto.

En declaracións a EFE, aclararon que non traballaba nunha obra executada pola Xunta, senón que era unha persoa á que contrataba o centro de forma habitual para pequenas tarefas de mantemento.