Falecen con seis días de diferenza os xemelgos máis famosos de Francia

Os irmáns Bogdanoff, os xemelgos máis famosos de Francia, coñecidos por lanzar o primeiro programa televisivo de ciencia ficción no país, faleceron con seis días de diferenza, tras a morte este luns de Igor.

Os dous foron ingresados o 15 de decembro no hospital Georges Pompidou de París e o primeiro, Grichka, morreu o pasado 28 de decembro, aos 72 anos de idade.

Aínda que a familia non quixo pronunciarse sobre a causa, a súa contorna asegurara á prensa que ningún dos dous estaba vacinado contra o coronavirus, e cando Grichka morreu, tras varios días en coma, atribuíu o seu falecemento á covid.

Segundo a cadea BFM TV, non eran antivacinas, pero consideraban que estaban en boa forma física e que non formaban parte do grupo que debía inmunizarse.

Os xemelgos, descendentes da aristocracia austríaca, saltaron á fama en Francia como presentadores do programa de ciencia ficción 'Temps X', en antena de 1979 a 1987.

Igor e Grichka, que nesa emisión se vestían con rechamantes fundas prateadas, eran tamén recoñecidos polo seu particular rostro, de queixo e pómulos prominentes. A pesar da evidente transformación da súa cara ao longo dos anos, ambos negaran recorrer á cirurxía estética ou padecer acromegalia.

Eran doutores en Física e Matemáticas, escritores e figuras destacadas da divulgación científica para o gran público, aínda que parte da comunidade científica criticara a súa obra e consideraban que esta tiña escaso valor.

En xuño 2018 foron imputados por estafa a persoa vulnerable, sospeitosos de aproveitarse da vulnerabilidade dun millonario de 54 anos que se suicidou en agosto dese ano, e o xuízo ante o Tribunal Correccional de París estaba previsto para este xaneiro, segundo o diario Le Monde.