Protección Civil levanta o confinamento pola nube tóxica con cloro en cinco concellos cataláns

Protección Civil levantou xa o confinamento nos cinco municipios de Barcelona e Tarragona afectados pola nube tóxica xerada por un incendio nunha fábrica que almacena derivados de cloro. En tres dos concellos afectados  aínda manteñen as limitacións para persoas vulnerables.

A conselleria de Interior e Seguridade Pública, Núria Parlon, informou en conferencia de prensa que os bombeiros lograron estabilizar o incendio, que afecta a unha nave de produtos de limpeza de piscinas en Vilanova i la Geltrú. Explicou que aínda mantén o confinamento total nun perímetro de 500 metros ao redor da nave que arde.

En Vilanova, Roquetes e Sant Pere o confinamento ten limitacións para as persoas vulnerables, como enfermos ou maiores, dado que o incendio provoca emanacións de derivados de cloro.

A Policía Local de Vilanova i la Geltrú (Barcelona) habilitou un sistema para o traslado das persoas vulnerables a un espazo seguro, se é necesario, como consecuencia do confinamento da poboación decretado por mor da nube tóxica xerada polo incendio dunha industria da localidade.

Confinamento de madrugada dos veciños de cinco concellos cataláns

Os veciños de cinco concellos costeiros de Barcelona e Tarragona foron confinados nas súas casas por unha nube tóxica xerada por un incendio que se orixinou na madrugada deste sábado nunha fábrica de produtos químicos para piscinas en Vilanova i a Geltrú. Nas instalacións están almacenadas unhas setenta toneladas de cloro.

Protección Civil de Cataluña informou de que enviou unha mensaxe aos teléfonos móbiles dos veciños das localidades costeiras de Vilanova i a Geltrú, Sant Pere de Ribes, e Cubelles, na provincia de Barcelona, e Cunit e Calafell, na de Tarragona, así como do núcleo de Roquetes para pedirlles que se confinen e non saian á rúa, non abran xanelas nin portas nin utilicen aparellos de climatización.

Fontes de Protección Civil, que activou a alerta do seu plan de riscos químicos PLASEQCAT, indicaron a EFE que a nube, de momento, non ocasionou feridos e que a dirección do vento está a dirixila cara ao mar.

Os Bombers da Generalitat, indicaron que o incendio está en fase de estabilización e que lograron frear a súa propagación ás naves veciñas.

O incendio comezou por causas que se descoñecen sobre as 02:20 horas desta mañá na nave de empresa Clim Waterpool, que traballa con produtos de limpeza de piscinas, situada na rambla dels Països Catalans, número 18, de Vilanova i la Geltrú.
 

O incendio afectou á circulación de trens e ao tráfico rodado na C-31. Pola tarde restablecíase o servizo

Inicialmente, para facilitar o traballo dos servizos de emerxencias, está cortada á circulación a autoestrada C-31 á altura de Vilanova i a Geltrú. Tamén o estivo ata primeira da mañá a C-15.

Tampouco circulaban polas poboacións afectadas pola orde de confinamento os trens da liña R2 sur e as liñas rexionais que pasan polo corredor que atravesa os municipios afectados.

Debido á nube tóxica e ao confinamento decretado, Renfe informou de que non é posible habilitar un servizo alternativo por estrada nesa zona, aínda que algúns trens finalizan o seu percorrido en Torredembarra ou Tarragona, desde onde si é posible establecer servizos alternativos por estrada

No incendio traballaron sesenta efectivos dos bombeiros con vinte dotacións terrestres, entre elas o furgón de riscos químicos e persoal do grupo de riscos tecnolóxicos e operativos de apoio.

O Sistema de Emerxencias Médicas (SEM) desprazou tamén á zona tres unidades aínda que, de momento, non se atendeu ningún ferido. No lugar permanecen tamén dotacións dos Mossos e da Policía Local de Vilanova.

Protección Civil, desde o seu centro de coordinación CECAT, mantén o contacto cos concellos de Vilanova i la Geltrú, Sant Pere de Ribes, Cubelles, Cunit e Calafell, e coas súas respectivas policías locais.

Sen partículas tóxicas no aire

Os bombeiros da Generalitat explicaron o sábado pola tarde que nas análises realizadas na contorna do incendio e no fume non se atoparon partículas tóxicas no aire. Isto permitiulles aos bombeiros  comezar a traballar no desentullo do material ocasionado polo propio incendio e tamén retirar o material almacenado na propia fabrica para trasladalo a un lugar seguro. 

Este material poi retirado ás aforas do nucleo urbano de Vilanova i la Geltrú, onde será vixiado ata que non supoña ningún perigo.

O incendio está controlado pero a nave industrial corre perigo de colapsar

Os bombeiros da Generalitar xa teñen o incendio controlado, segundo infoma Emerxencias de Cataluña, pero agora a nave corre perigo de colapsar. O derrubamento da nave sería un problema porque aínda queda produto derivado do cloro no seu interior polo que os bombeiros, nas próximas horas, "monitorizarán este produto e continuarán coas medidas no exterior" do edificio.