Falece un traballador ao caer dun camión de recollida de lixo en Ourol
Os sanitarios non puideron facer nada por salvar a vida do operario, que quedara inconsciente ao caer do camión de recollida de lixo
A vítima tiña 48 anos e era o seu primeiro día de traballo
Un operario que estaba a traballar no servizo de recollida de lixo do municipio lucense de Ourol, na comarca da Mariña, perdeu a vida a pasada madrugada ao caeer do camión, segundo informou o Centro Integrado de Atención ás Emerxencias de Galicia (CIAE).
Segundo a información facilitada pola central de emerxencias, o 112 Galicia recibiu aviso do sinistro ás 05:30 horas desta madrugada. Cando se produciu o accidente, a vítima estaba a traballar na Rúa da Igrexa, en Ourol.
Por causas que se descoñecen, caeu da parte traseira do camión no que era o seu primeiro día de traballo. O operario falecido tiña 48 anos e era veciño da parroquia de Bravos. O suceso causou unha fonda conmoción en todo este concello mariñao.
#AXEGAInforma dun traballador falecido
— 112 Galicia (@112Galicia) July 1, 2025
📍Rúa da Igrexa, #Ourol
▶️Sufriu unha caída do camión da recollida do lixo
🚨Urxencias Sanitarias de Galicia-061, @guardiacivil, Protección Civil de Ourol
🔗https://t.co/Zx44e7QeJU pic.twitter.com/axpR07vqep
Tras recibir o aviso, ata o lugar do sinistro trasladouse un equipo sanitario de Urxencias Sanitarias de Galicia-061. Con todo, os sanitarios non puideron facer nada por salvar a vida do operario, que quedara inconsciente ao caer do camión de recollida de lixo. Para apoiar o equipo médico, o 112 Galicia mobilizou a Garda Civil e a agrupación de voluntarios de Protección Civil de Ourol.
A Garda Civil investiga agora as circunstancias do sinistro.
