Falece un home de 76 anos en Baiona tras ser rescatado da auga con síntomas de afogamento
Todo apunta a que a vítima tivo unha indisposición mentres se bañaba
O equipo médico intentou repetidamente a reanimación cardiopulmonar e foi trasladado ao centro de saúde da localidade, pero faleceu
Un home de 76 anos faleceu no municipio pontevedrés de Baiona tras ser rescatado da auga con síntomas de afogamento.
Pasaban as sete da tarde cando o 112 comezou a recibir as chamadas de alerta. Máis dunha ducia de bañistas solicitaban asistencia médica urxente para un home que acababan de rescatar da auga na praia de Santa Marta, en Baiona. Estaba inconsciente con síntomas de afogamento.
"Os bañistas que estabana percibiron que estaba aboiando na auga, era unha zona pouco profunda, á altura da cintura, pero estaba flotando", explica Plácido Biéitez, xefe da Policía Local de Baiona.
Tanto as persoas que o sacaron da auga como o equipo médico intentaron repetidamente a reanimación cardiopulmonar. Mesmo chegaron a trasladalo nunha das ambulancias ao centro de saúde da localidade.
"O facultativo decidiu trasladalo ao PAC do Valmiñor para ver se o daban recuperado. Pero non pintaba ben, estaba en parada cardiorespiratoria. Eles intentaron facer o posible pero pasadas as oito da tarde soubemos que morrera", engade o axente.
Descoñécese cal foi o motivo do afogamento, pero todo apunta a unha indisposición, xa que non se trata dunha praia perigosa para o baño. Durante a emerxencia tamén foi necesaria a mobilización doutra dotación médica para a parella da vítima, que quedou completamente bloqueada ante a traxedia.
