As lesións oculares e os problemas de ansiedade son urxencias médicas frecuentes estes días
Hai incidencias nas telecomunicacións dalgúns centros de saúde por mor dos incendios
A Xunta reorganiza a atención médica na provincia de Ourense desde este luns
O persoal sanitario do PAC de Trives viu incrementadas as urxencias por lesións oculares e problemas de ansiedade debido ao lume
Profesionais sanitarias que atenden as urxencias médicas en Trives relatan como foron as últimas xornadas de traballo nunha das zonas castigadas polo lume.
"Levamos oito días con este incendio e isto é esgotador, ves que non se dá resolto", conta a enfermeira.
"O xoves isto estaba moi cheo de fume. A visibilidade era moi curta. O sistema informático caeu e puxémonos a traballar á man".
"Atendemos varios brigadistas, xente común, membros de Protección Civil. A maior afectación foi ocular".
"A min tocoume máis o tema da ansiedade, porque a xente viuse rodeada do fume, viuse que non esperaba a situación e chegou e dicía "que facemos?".
"A xente, a maioría moi resiliente, vén a que o curen, a que lle fagan a vendaxe e a pesar de que está afectada, que está o perigo inminente, sente a necesidade de axudar", din as doutoras.
Debido aos incendios, algúns centros médicos teñen incidencias nas telecomunicacións. A Xunta decidiu centralizar a atención sanitaria nos centros de cabeceira do Barco de Valdeorras, A Rúa, Viana do Bolo, A Pobra de Trives, Verín e Montederramo.
.png)