Falece Amancio Amaro, lenda do fútbol galego
Falece Amancio Amaro, lenda do fútbol galego
O Real Madrid, club do que era presidente de honor, comunicou o seu falecemento aos 83 anos
Naceu na Coruña e xogou ata os 22 anos no Deportivo, co que logrou un ascenso a Primeira División
O seu palmarés é impresionante, con nove Ligas, tres Copas, unha Copa de Europa ou unha Eurocopa coa selección española
O Real Madrid comunicou o falecemento de Amancio Amaro Varela, o seu presidente de honor, aos 83 anos. Nacido na Coruña, Amancio está considerado como un dos mellores xogadores da historia do fútbol español.
Hasta siempre, Amancio, presidente de honor del Real Madrid.#RealMadrid
— Real Madrid C.F. (@realmadrid) February 21, 2023
Os inicios de Amancio están vencellados ao Victoria coruñés. De aí pasou ao Deportivo, onde xogou durante catro temporadas. Fíxoo sempre na Segunda División (1958-62) e despediuse en grande, co ascenso a Primeira e proclamándose máximo goleador da categoría con 25 goles.
Era o principio dunha gran traxectoria. Ao ano seguinte asina co Real Madrid, onde se converteu nun mito. Alí estivo 14 temporadas, nas que gañou nove Ligas, tres Copas ou unha Copa de Europa, entre outros múltiples trofeos. Gañou dous trofeos como máximo goleador e disputou 471 partidos oficiais (155 goles en total).
Coa selección española gañou a Eurocopa de 1964, naquel equipo en que era xunto ao tamén galego Luís Suárez unha das indiscutibles estrelas. En total vestiu a camisola vermella en 42 ocasións.
