Melissa Gómez coincidiu en Cuba con Martiño Ramos: "Era un baboso. Sempre andaba con mulleres novas"

No Galicia por diante, da Radio Galega, falaron este martes con Melissa Gómez, unha veciña da Habana que se atopou alí con Martiño Ramos, o profesor fuxido de Ourense tras a condena de 13 anos de cárcere por violar repetidamente unha menor. "Eu coñecino como o fotógrafo español Martín Soto hai mes e medio", explica.

Coñeceuno porque quedou cunha amiga súa a través dunha web de citas e enseguida notou algo raro: "Por que un home de 50 anos quería saír cunha rapaza de 20. Era un home un pouco baboso, cunha atención sobrecargada sobre as mulleres". Incomodadas por esa actitude, romperon o contacto con el. E cando volveron velo xa foi en redes, coa alerta lanzada por Madres Protectoras. "Era importante compartir a información, porque outras rapazas poderían non notar ese elemento raro que notamos nós. Viámolo con moitas rapazas novas". 

Ela foi unha das persoas que avisou da súa localización. E pon en valor o feito de que máis xente reaccionara tamén de forma rápida para evitar novos abusos.