Este martes comezan os traballos de renovación do firme da AP-53 entre Lalín e Dozón
Os labores de renovación durarán previsiblemente ata finais de xullo
Desviarase o tráfico pola calzada contraria a través dos pasos de mediana
A N-525 empregarase como ruta alternativa para os accesos que permanezan pechados
.png)
O Ministerio de Transportes e Mobilidade Sostible, a través da sociedade concesionaria ACEGA, anunciou que este martes iniciará os traballos de renovación do firme na autoestrada AP-53, entre os municipios de Lalín e Dozón (Pontevedra).
Segundo trasladou o Goberno central nunha nota de prensa, para "garantir a seguridade dos traballadores e usuarios", o tráfico será desviado pola calzada contraria a través dos pasos de mediana existentes na autoestrada. Estes desvíos estarán sinalizados.
Neste contexto, os traballos realizaranse en horario diúrno, de luns a venres; mentres que as fins de semana habilitaranse as dúas calzadas para o paso de vehículos.
Debido ás actuacións, que durarán previsiblemente ata finais de xullo, algúns accesos e saídas da autoestrada deberán permanecer pechados temporalmente e utilizarase a N-525 como ruta alternativa.
.png)
