Epi: "Cando o club teña algo que comunicarme, vaino facer"
O técnico confirma a baixa de Álex Hernández por lesión: "Merece un monumento pola persoa e o profesional que é"
Diego Epifanio apela ao traballo e á profesionalidade indubidable dos seus xogadores e de todos os integrantes do Leyma Coruña nas dúas xornadas que restan de campionato.
"Xogámonos moito a nivel persoal, profesional e de respecto aos nosos afeccionados e ao club", asegura.
Mentres o equipo afronta este sábado o intranscendente duelo contra o UCAM Murcia, o técnico burgalés pon en mans do club a continuidade do proxecto que arrincou na Coruña fai xa tres tempadas.
"Eu teño contrato. Eu traballo en defender a imaxe do club e a miña como profesional. Cando o club teña algo que comunicarme, se o ten, vaino facer. Se non, entendemos que a relación seguirá"; comentou na sala de prensa do Palacio de Riazor.
A poucas horas de afrontar o último partido a domicilio na ACB, o Leyma volve ter problemas coas lesións. O último en sumarse á enfermería é o capitán, Álex Hernández.
"Leva arrastrando un mes unhas molestias na boneca que lle impediron adestrar a gusto, pero non que estivese todos os minutos do adestramento na pista. Merece un monumento pola persoa e o profesional que é", desvelou.
