Carles Marco, novo adestrador do Leyma Básquet Coruña
Chega procedente do Paris Basketball, onde exerceu como técnico asistente do brasileiro Tiago Splitter
O catalán Carles Marco será o substituto de Diego Epifanio no banco do Leyma Básquet Coruña, ao que chega procedente do Paris Basketball, onde exerceu como técnico asistente do brasileiro Tiago Splitter.
“Carles Marco é un adestrador ao que lle gusta o xogo alegre, dinámico e divertido para o espectador, e de transicións rápidas baseadas nunha defensa agresiva. Dálle moito valor a poder defender moi forte e físico, para así poder conseguir transicións tras rebote defensivo, tras canastra”, destaca o club no seu comunicado.
O xa adestrador do conxunto laranxa arrincou a súa carreira nos bancos na tempada 2012-13 como adestrador axudante do Manresa na liga Endesa. Tras catro tempadas na entidade catalá, no curso 2015-16 converteuse no primeiro adestrador do Oviedo Club de Baloncesto, co que gañou a Copa Princesa e disputou as semifinais do playoff de ascenso a Liga Endesa na súa última tempada. Posteriormente, Marco enrolouse no Palencia antes de recalar en Bàsquet Xirona para dirixir ao equipo catalán na súa primeira tempada na LEB Oro (2020-21).
