España encarrila o pase a cuartos goleando a Bélxica (6-2)

Sen Aitana de saída, España mediuse con Bélxica xa con Irene Paredes protexendo a área e de novo con Esther  González na dianteira e Vicky López no centro do campo. Os primeiros minutos da selección estiveron marcados pola imprecisión e tamén polas dificultades para romper o muro belga. Conseguiuno Alexia aos vinte minutos, tras unha xogada trenzada por Patri Guijarro e a incombustible Vicky López. 

Aínda celebraba España o segundo tanto de Alexia nesta Eurocopa, cando Bélxica empatou o encontro. Vanhaevermaet, unha futbolista de envergadura, remataba de cabeza un saque de esquina mal defendido pola selección. 

España volveu remar, non sen traballo, para dar con ocos na defensa rival. Atopouno Irene Paredes nun córner. A defensa barcelonista debuta con gol neste torneo. E a piques estivo a selección de marchar cun terceiro ao descanso, pero Janssens frustrou o disparo de Vicky na mesma liña de gol. 

Montse Tomé axustou o once tras o paso por vestiarios e deulle entrada a Aitana en substitución de Vicky. A gañadora do Balón de Ouro rozou o gol aos tres minutos de xogo. Non acertou Aitana pero si Bélxica nunha acción revisada polo VAR por posible fóra de xogo de Hanna Eurlings. Subiu o gol ao marcador e España respondeu con contundencia. Aitana e Alexia teceron a contra que Esther culminou co seu terceiro gol neste torneo. España exhibía autoridade a estas alturas do partido. Mariona Caldentey asinou o cuarto da selección ao controlar un balón dividido tras un saque de esquina.

O dominio español permitiulle á seleccionadora refrescar o once nos minutos finais. Lonxe de relaxarse, a selección apertou o acelerador e chegaron o quinto cun disparo soberbio de Claudia Pina dende a frontal e o sexto nun saque de esquina que culminou Alexia. España, líder de grupo, encarrila cunha nova goleada o seu pase a cuartos de final.