Costas Kadis, comisario de Pesca: "Galicia é o centro europeo da pesca, iso séntese en todas as partes"

O comisario europeo de Pesca e Océanos, Costas Kadis, defendeu este venres nunha entrevista para a Televisión de Galicia o equilibrio entre a sostibilidade dos espazos marítimos e a rendibilidade do sector pesqueiro.

Na súa primeira visita oficial a Galicia desde que foi elixido comisario, Kadis dixo saber o importante que é o sector pesqueiro para Galicia. "É o centro europeo da pesca", asegurou. "Iso séntese en todas as partes, incluso se pode cheirar".

"O que me gusta moitísimo é falar cos pescadores, cos que están traballando a diario nisto", asegurou o comisario, quen dixo: "Das miñas conversas levo unha información valiosísima e moi útil que servirá para elaborar políticas".

Pacto dos Océanos

Costas Kadis cre que o Pacto dos Océanos, recentemente presentado, servirá como estratexia política global de primeiro nivel para o desenvolvemento sostible en Europa e será o marco único de referencia para todas as políticas sobre pesca que afecten aos océanos.

Explicou sobre ese pacto: "Un dos principais obxectivos é promover a economía azul sostible, incluíndo os sectores tradicionais como a pesca e a acuicultura".

"No pacto", di o comisario, "hai iniciativas específicas para lograr eses obxectivos, como por exemplo a reavaliación e posible revisión da política pesqueira común, iniciativas para apoiar a pesca artesanal e á pequena escala, tamén para que a acuicultura sexa máis sostible e rendible en Europa. Todas esas iniciativas vanse materializar durante os próximos anos e beneficiarán o sector e zonas como Galicia, por exemplo".

Futuro da política pesqueira común

En canto aos pasos na lexislación europea en relación coa pesca, Kadis cre que haberá cambios no curto e medio prazo: "O regulamento da política pesqueira común e a súa reavaliación vaise realizar con información que nos chega de toda Europa. Pero teño que dicir que a maioría da información nos chega de España e desta rexión, o cal dá a entender o importante que é o sector en Galicia".

"A nosa intención é traballar sobre a base dos aspectos positivos desta política, porque a política pesqueira común xa deu resultados positivos tanxibles. Hai dez anos había moi poucas poboacións de peixes que se estiveran pescando a niveis sostibles. Agora hai moitísimos máis. Iso quere dicir que a política pesqueira común xa deu resultados positivos", explicou para defender os resultados da regulamentación comunitaria vixente.

"Non obstante, a última revisión foi hai doce anos, polo que hai que ver se aínda serve para os fins que se desexa conseguir e se hai algúns puntos débiles na lexislación. Aí estamos falando da descarbonización da flota pesqueira, garantir a seguridade e hixiene a bordo, a dimensión social da política pesqueira común, o equilibro de xénero, a remuda xeracional, todas esas cuestións hai que abordalas durante a reavalicaión. A nosa intención é actuar de maneira focalizada para tratar todos eses problemas", dixo o comisario.

Veto á pesca de fondo

E sobre a posible solución ao veto da pesca de fondo en 87 áreas, que afecta á flota palangreira galega, Costas Kadis mantén unha posición de neutralidade, case de árbitro: "A Comisión Europea é a gardiá dos tratados. Nós temos que respectar e obedecer o que decidiron os colexisladores e a recente sentenza do Tribunal Europeo de Xustiza, así que, calquera acción que emprendamos terá que desenvolverse dentro do marco da regulamentación e respectando esa sentencia".

De todos os xeitos, ábrese a revisar o regulamento sobre mares profundos, aínda que di: "Terá que basearse na avaliación de repercusións con datos científicos sólidos para asegurarnos de que certas artes de pesca non teñan un impacto negativo nos espazos mariños".

De todos os xeitos, defende que as políticas para preservar espazos mariños vulnerables e, en xeral, as zonas mariñas protexidas, a medio e longo prazos darán resultados positivos non só para os ecosistemas mariños, senón para os pescadores e as comunidades costeiras. "Temos bos exemplos de que isto é así. Nós imos traballar xunto co sector e cos afectados para que esta política beneficie todo o posible non só os espazos mariños, senón o sector pesqueiro".