Entrégase o condutor que se dera á fuga tras ferir unha axente nunha persecución en Salceda hai 20 días

O condutor que se deu á fuga tras deixar ferida unha axente nunha persecución en Salceda de Caselas o pasado 23 de xullo entregouse este mércores no cuartel da Garda Civil do Porriño.

Foi sobre as 10.15 horas desa mañá cando o home, acompañado do seu avogado, se presentou nas instalacións da Garda Civil, unha vez era coñecedor de que os investigadores coñecían a súa identidade e andaban na súa procura. Todo iso despois de máis de 20 días en paradoiro descoñecido.

Ao home atribúenselle ata seis delitos: dous delitos contra a seguridade viaria, un de atentado a axente da autoridade, outros dous delitos de lesións e un de danos. Por todo iso, sobre as 12.00 horas foi posto ao dispor xudicial do Xulgado número 3 do Porriño, en funcións de garda, que o deixou en liberdade pendente de volver ser citado.

Os feitos ocorreron sobre as 14.00 horas do 23 de xullo, cando o condutor se deu á fuga en Salceda tras provocar un accidente durante unha persecución na que resultou ferida unha policía local do municipio pontevedrés.

Os axentes deron o alto a un vehículo que circulaba polo centro do pobo, ante o cal o condutor emprendeu a súa fuxida. Así se iniciou unha persecución desde a rúa Vigo ata o barrio de Maceira, en Parderrubias, pola estrada paralela á PO-510.

Durante a persecución produciuse un colisión despois de que o condutor fuxido detivese a marcha de forma repentina e iniciase unha manobra de marcha atrás, co que impactou contra o vehículo policial.