Buscan un condutor que fuxiu e deixou ferida unha axente nunha persecución por Salceda de Caselas
Durante a persecución produciuse unha colisión
O Concello detalla que a axente se atopa ben e permanece baixo vixilancia médica
A Garda Civil busca a un condutor que fuxiu en Salceda de Caselas tras provocar un accidente durante unha persecución na que quedou ferida unha policía local do municipio pontevedrés. O Concello de Salceda de Caselas informa de que, ao redor das 14:00 horas, dous axentes da Policía Local sufriron un accidente nesta persecución no que resultou ferida unha policía.
Os axentes deron o alto a un vehículo que circulaba polo centro da vila, ante o cal, o condutor emprendeu a fuga. Así se iniciou unha persecución desde a rúa Vigo ata o barrio de Maceira, en Parderrubias, pola estrada paralela á PO-510. Durante a persecución produciuse un colisión despois de que o condutor fuxido detivese a marcha de forma repentina e iniciase unha manobra de marcha atrás, co que impactou contra o vehículo policial.
O Concello detalla que a axente se atopa ben e permanece baixo vixilancia médica. Así mesmo, trasládalle o seu apoio e deséxalle unha pronta recuperación.
