Enterrar os mortos, un medio de vida tamén para elas
Unha veciña de San Sadurniño é unha das poucas sepultureiras que traballan en Galicia
Alicia Aneiros ocúpase de dez cemiterios no seu concello e mais en Narón, Moeche e Cerdido
Alicia Aneiros é unha rara avis dentro da súa profesión, que non é outra que a de sepultureira. Herdouna do seu pai, Lolo, un veciño de San Sadurniño que se xubilou hai oito anos. A súa filla ía para enfermeira, pero deixouno ao ver un nicho de negocio no oficio de enterrar finados.
"A miña parella á parte é compañeiro, e cando comezaba a ir co meu pai e mais con el, a xente maior faláballes máis a eles en vez de explicarmo a min. Unha vez eu díxenlles: 'Ola, son eu a enterradora'", conta a sepultureira.
Hoxe Alicia leva os cemiterios dunha decena de parroquias da comarca de Ferrol. E, de forma ocasional, as funerarias tamén lle encargan enterros en camposantos do Eume, de Ortegal e mesmo da Terra Chá. Traballo, polo tanto, non lle falta.
"É un traballo complicado. Non é como pensa a xente, que pensa que son cinco minutos nos que abro unha tapa e xa está", sinala.
Ademais de ser unha das poucas sepultureiras que hai no noso país, a Alicia non lle consta ningunha outra que, coma ela, sexa autónoma. O cal demostra que, tanto por conta allea como propia, enterrar os mortos pode ser un medio de vida para calquera.
