Aumenta a demanda dos libros de texto de segunda man

A menos dun mes para a volta ás aulas, toca comezar cos preparativos e un ano máis os libros de texto subiron de prezo. Este ano, os libreiros xa confirmaron que os prezos subiron entre un 5 e un 6%.

A compra de libros e material escolar representa un reto importante para as familias españolas. Máis de 300 euros de gasto medio por fillo. Isto xera que cada vez máis familias opten pola compra dos libros de segunda man.

Segundo o voceiro de Milanuncios, Íñigo Vallejo, arredor dun 60 % das familias xa recorreu a aplicacións de segunda man noutros anos para estas compras e o 80 % non desbota facelo para este ano.

"Espero poder o ano que vén mercalos de segunda man, porque é, é demasiado. Paguei moitísimo este ano", comenta unha familia.

O aforro ao realizar a compra ou venda dos libros estímase nun 54% por alumno. Non só inflúe a redución do prezo, senón o obtido pola venda dos libros que xa non serven.

"O que saco de aí ao mellor vai para mercar uns zapatos ou roupa que tamén precisan agora moita", confesa unha señora.

Galicia é unha das comunidades onde máis aumentou a demanda de libros usados e a cuarta que máis anuncios publica para a súa venda. Xa non só polos cartos, tamén lle dan importancia á economía circular.

"Dáslle unha segunda vida, terceira, cuarta aos libros que moitas veces van para o lixo sen uso practicamente", comenta unha muller.