A Xunta aumenta un 25 % o apoio ás familias na volta ao cole

O conselleiro de Educación, Ciencia, Universidades e FP, Román Rodríguez, sinalou que nos últimos catro anos o Goberno galego mobilizou máis de 100 millóns de euros en axudas para a volta ao cole. 

"O que supón un incremento desde o curso 2022-2023 de máis dun 25 % e máis de 100.000 novos beneficiarios nos últimos catro anos", destacou.

Rodríguez informou este mércores sobre as liñas de apoio da Xunta ás familias no novo curso escolar poñendo a atención na nova desgravación fiscal pola compra de libros e material escolar. As familias deben gardar as facturas para optar á medida.

Na súa visita á librería Clip en Pontevedra, destacou que o inicio do curso supón certa tensión económica, circunstancia da que a Xunta está pendente.

O conselleiro enumerou varias medidas implementadas pola Xunta, como a ampliación do bono material escolar, matrículas gratuítas e desgravacións fiscais na declaración do IRPF de 2026.

A iniciativa vai dirixida ás familias, con rendas per cápita entre 10.000 e 30.000 euros, que ata agora quedaban fóra das axudas que operan para rendas inferiores a esa cantidade.

A desgravación cobre o 15 % do facturado, cun máximo de 105 euros por fillo e estímase que o aforro que alcanzará será de 6,3 millóns de euros a unhas 60.000 familias.

A volta dos libros de texto e das librerías

O propietario da librería Clip remarcou ao conselleiro as boas sensacións polo inicio da campaña escolar. 

A boa valoración ten que ver coa novidade da incorporación do alumnado E-Dixgal ás axudas de libros de texto. Esta novidade está dentro da aposta da Xunta por avanzar nun modelo de ensino híbrido.

"A implantación dos libros de texto en quinto e sexto de primaria, que antes era todo tecnolóxico coas tabletas, foi un aliciente que nos deu un pouquiño de vida ás librerías", explicou o libreiro.

Tamén sinalou que comezan a vender con máis normalidade, incidindo en que a volta do libro de texto volveu reactivar as librerías.