As familias galegas xa poden gardar as súas facturas para desgravar libros de texto
A renda per cápita da unidade familiar debe estar entre 10.000 e 30.000 euros e aplicarase na próxima declaración da renda
Os contribuíntes poderán desgravar o 15 %, cun máximo de 105 euros por fillo
As familias galegas cunha renda entre 10.000 e 30.000 euros anuais por cada membro familiar deberán gardar as facturas das compras de libros de texto e material escolar se queren aplicar a desgravación fiscal de ata un 15 % na próxima declaración da renda.
Así o lembraron os conselleiros de Educación, Ciencia, Universidades e FP Román Rodríguez e o de Facenda e Administración Pública Miguel Corgos, que visitaron a librería Follas Novas, en Santiago de Compostela.
Rodríguez sinalou que se trata dunha medida de apoio ás familias no ámbito educativo, polo que convidou os pais e nais a gardaren as facturas de compra de libros e material escolar ata o 31 de decembro para facer así efectiva a dedución no próximo exercicio.
"En concreto, poderán desgravar ata 105 euros por fillo ou filla matriculados en Educación Primaria e Secundaria", detallou Corgos.
O responsable autonómico de Facenda asegurou que permitirá aforrar uns 6,3 millóns de euros aos fogares galegos e insistiu na importancia de que as familias pidan as facturas, que non os tíckets para que poidan incluílas na declaración da renda do próximo ano.
Rodríguez recordou que a Xunta expón outras medidas de apoio para as familias con ingresos inferiores aos 10.000 euros, como é o programa de préstamo de libros e os cheques.
"Trátase de axudar a quen máis o precisa", destacou Rodríguez.
Poderán aplicar estas desgravacións fiscais as familias de nenos que cursen ciclos de ensino obrigatorio tanto de colexios públicos como privados ou concertados, xa que, segundo lembrou o conselleiro, o que discrimina é o nivel de renda de cada membro da unidade familiar.
"Sempre quixemos ter un sistema que apoie a calidade e a equidade", insistiu Rodríguez.
"A nosa premisa é axudar máis a quen máis o precisa", agregou Rodríguez.
Ao ser preguntado por unha posible recuperación da gratuidade total dos libros de texto, indicou que, desde 2009, cando o PP chegou á Xunta, entenderon que a fórmula actual de cheques e axudas é a máis xusta socialmente.
No curso que acaba de finalizar, ata 163.023 alumnos tiveron libros gratuítos a través de axudas e ata 126.754 accederon tamén a cheques para material escolar.
