Ingresa en prisión unha muller tras agredir unha menor en pleno centro de Pontevedra
A muller, de 44 anos, suma máis dunha decena de arrestos por episodios violentos rexistrados na cidade
A Policía Nacional detivo este luns unha muller de 44 anos tras agredir violentamente unha menor de quince anos na rúa Benito Corbal.
O suceso tivo lugar sobre as 18:00 da tarde. Testemuñas relatan que a agarrou polo pescozo e o pelo, tirouna ao chan e arrastrouna pola vía durante polo menos dez metros.
Un axente da Policía Nacional que se atopaba fóra de servizo interveu de inmediato para reducila. Pouco despois foi detida.
A muller, que suma máis dunha decena de arrestos por episodios violentos, ingresou en prisión provisional na Lama por orde do xulgado de Pontevedra.
A pesar do seu amplo historial delituoso, ata o de agora quedara en liberdade tras cada detención, pero a gravidade dos feitos recentes motivaron o seu ingreso inmediato na cadea.
Ante a crecente preocupación cidadá por estes feitos, un grupo de veciños lanzou unha campaña en redes sociais para promover unha denuncia colectiva contra ela.
