Haberá unha xuntanza do Celta coa policía de Lión pola seguridade dos seus afeccionados

O Celta informou os seus afeccionados de que este mércores representantes do club manterán unha reunión coa policía de Lión para valorar que alternativas poden ofrecer a aqueles seguidores do equipo galego que acudan directamente ao Groupama Stadium.

A seguridade dos preto de 3.000 afeccionados celestes que viaxarán a Francia viuse ameazada polos violentos incidentes que se viviron a noite anterior ao encontro de Balaídos en Vigo, onde un grupo de ultras locais atacou a afeccionados do Lión nunha céntrica rúa da cidade.

Desde entón, o desprazamento récord do celtismo nunha competición europea, superando os 2.500 afeccionados que acudiron a Old Trafford para presenciar a histórica semifinal da UEFA contra o Manchester United de Jose Mourinho en 2017, viuse embazado polo temor dos seguidores galegos a sufrir represalias.

Para evitar incidentes, o Celta convocou os seus afeccionados nun punto de Lión, onde recollerán a pulseira que permitirá o acceso ao estadio. Desde alí, ademais, serán trasladados ao estadio en autobuses lanzadeira oficiais. Aqueles que, pola súa viaxe, non poidan acudir ao momento de encontro serán informados de como deberán chegar ao estadio tras a reunión coa policía gala, que será ás seis da tarde deste mércores