Francisco Vázquez Rogel colle o temón do C. D. Arenteiro
O máis urxente é saldar a débeda con xogadores e traballadores antes do 30 de xuño para non descender a Terceira RFEF
Foto Arenteiro
Francisco Vázquez Rogel, de 52 anos e natural de Vilagarcía, é o novo presidente do C. D. Arenteiro. O empresario inmobiliario, que centrou o seu traballo en Madrid, foi o único en presentar unha candidatura durante este proceso de cambio.
Fíxoo o 16 de xuño e agora asume o reto de endereitar o futuro da entidade, coas débedas como principal e urxente problema a solucionar. A substitución fíxose oficial na Asemblea Extraordinaria que celebrou a entidade no campo de Espiñedo.
O novo presidente sabe que o primeiro é saldar a débeda con xogadores e traballadores. Ten que facelo antes do 30 de xuño para non descender a Terceira RFEF, o que suporía encadear dous descensos consecutivos.
