Educación prevé convocar 1.500 prazas para docentes en 2027, cun orzamento de 3.320 millóns

A Xunta convocará ao redor de 1.500 prazas docentes nas oposicións do próximo verán, segundo anunciou este luns o conselleiro de Educación, Ciencia, Universidades e FP, Román Rodríguez, quen presentou no Parlamento galego o orzamento do seu departamento, que contará con 3.320 millóns de euros para 2027, un 7,5 % máis ca este ano.

O orzamento aumenta en 230 millóns respecto a 2026 e alcanza un "máximo histórico", cunha subida dos recursos destinados a persoal do 9,7 %, ata superar os 1.985 millóns de euros, o 59,8 % do total.

Rodríguez vinculou este incremento á redución de cocientes, a reorganización dos horarios lectivos en Secundaria e o reforzo da atención á diversidade, medidas que, segundo indicou, permitirán contar este curso con preto de mil docentes máis que o ano anterior.

O número máis elevado de docentes dos últimos anos 

O conselleiro defendeu que Galicia mantén o maior número de profesores da súa historia recente, con máis de 32.700, pese ao descenso do alumnado, que caeu en 4.600 estudantes este curso e en 22.500 durante a última década.

Segundo os seus datos, os acordos educativos permitiron "evitar o peche dunhas 800 aulas en tres anos".

Entre os principais anuncios para 2027 figura a posta en marcha dunha oficina de apoio ao profesorado, con asesoramento xurídico e psicolóxico ante agresións, ameazas ou situacións de acoso, así como unha nova oferta de emprego público dunhas 1.500 prazas, pendente de concretar.

O orzamento inclúe tamén 36,47 millóns para o Marco galego para o impulso educativo, dos que 19,75 millóns executaranse en 2027.

Así, este curso despregaranse programas de reforzo en lectura e matemáticas, apoio extraescolar para alumnado de sexto de primaria e plans específicos de mellora nos centros. Para o próximo curso prevese actualizar o currículo de primaria e incorporar unha materia de lectura e comprensión lectora en secundaria.

Aulas Senda para atención á diversidade

En atención á diversidade, Rodríguez destacou a posta en marcha das aulas Senda e o reforzo dos recursos especializados. Ademais, destinaranse 70,3 millóns de euros a comedores escolares, un 7,3 % máis, e manteranse as axudas para libros e material escolar, con preto de 30 millóns.

O plan de nova arquitectura pedagóxica contará con 72,6 millóns para modernizar as instalacións educativas e construír o colexio Gerardo Fernández Albor, en Ames; e os institutos Domingo Villar (Vigo) e Padre Feijóo (O Pereiro de Aguiar).

Máis de 576 millóns para as 3 universidades galegas 

As tres universidades públicas galegas recibirán 576,2 millóns, o maior financiamento da súa historia, mentres que a función de investigación e ciencia alcanzará os 353 millóns, un 17,8 % máis.

A Formación Profesional dispoñerá de 20,8 millóns para desenvolver a estratexia galega do sector ata 2030; mentres que se destinarán 23,1 millóns de euros á transferencia de coñecemento ao tecido produtivo mediante iniciativas de colaboración público-privada e outros 12,8 millóns á súa valorización e á creación de empresas tecnolóxicas.

Ademais, reforzan en seis millóns o investimento en I+D empresarial e inclúen 1,3 millóns para impulsar os plans locais de investigación e innovación, con 40,2 millóns para ámbitos estratéxicos como a computación cuántica, dos que 33 millóns dirixiranse ao Centro de Supercomputación de Galicia (CESGA).

En definitiva, o conselleiro asegurou que o seu departamento está a desenvolver "a maior transformación do ensino dos últimos 30 anos", con cambios organizativos e medidas centradas na aprendizaxe e defendeu un proxecto no que, "con menos alumnado, hai máis profesorado e máis aulas abertas".

A oposición cuestiona as partidas e a execución

Desde o PSdeG, con todo, consideran "insuficientes" os recursos para mellorar os centros educativos e reforzar os persoais especializados.

O deputado Aitor Bouza reclamou que a Xunta aclare se o incremento de persoal "terá carácter estrutural" e denunciou carencias de orientadores e de profesionais de pedagoxía terapéutica e audición e linguaxe.

"De nada serve ter un PT ou un Ao en Educación Primaria se despois se lle quita en Secundaria", denunciou.

Bouza cuestionou tamén as partidas para infraestruturas escolares, que, segundo os seus cálculos, crecen só un 2 % en infantil e primaria e un 1,8 % en secundaria e bacharelato; así como a execución orzamentaria dos programas de prevención do abandono escolar e a redución dos fondos para formación do profesorado.

Pola súa banda, a deputada do BNG María Cristina Fernández Davila advertiu de que o aumento global do orzamento "non garante que se cubran as necesidades do sistema público".

Reclamou máis especialistas, mellores servizos de conciliación e actuacións en centros antigos, e criticou o incremento do 8,1 % das partidas destinadas ao ensino concertado: "As súas políticas, ao final, o que están a fomentar e impulsando é o ensino privado", denunciou.

Para rematar, desde Democracia Ourensá, o deputado Armando Ojea cuestionou a repartición territorial dos investimentos e considerou que Ourense queda por baixo doutras provincias en varias actuacións en centros escolares.