Duelo pola permanencia no Coliseum e estrea de Hughes na xornada ACB

Último contra penúltimo. Dous equipos case desafiuzados, Leyma e Granada. O que gañe recuperará folgos na procura do máis difícil aínda, a permanencia. Para os coruñeses, vencer por máis de tres puntos suporá o reforzo anímico de colocar ao seu rival de hoxe no último posto da clasificación.

Era un 2 de novembro do pasado ano, cando o Breogán apañaba en Zaragoza a súa derrota máis ampla desde que existe a ACB. 58 puntos de diferenza fronte a un equipo maño que visita nesta xornada o Pazo. Cambiaron moitas cousas, moitas caras, incluso a do adestrador. Pero o espírito de desquite debe existir.

Mañá un novo león ruxirá co Breogán. Elijah Hughes, a última fichaxe.