Dúas persoas quedaron feridas tras chocaren un coche e unha furgoneta en Caldas de Reis

Dúas persoas quedaron feridas, unha delas tras ser excarcerada, nunha colisión dun turismo e unha furgoneta que se rexistrou este domingo de madrugada en Caldas de Reis, Pontevedra.

O sinistro produciuse cara ás 05:00 horas no quilómetro 100 da estrada N-550, segundo informa o 112 Galicia.

Un particular avisou a Emerxencias de que chocaran unha furgoneta e un coche. Na chamada indicou que o turismo empezara a arder e que o outro vehículo implicado estaba envorcado.

Os bombeiros tiveron que empregar o material de excarceración para liberar o condutor da furgoneta, que foi trasladado ao hospital.

O condutor do outro vehículo tamén precisou ser evacuado.

Ademais de bombeiros e persoal sanitario, foron mobilizadas a Garda Civil de Tráfico, a Policía Local e a Agrupación de Voluntarios de Protección Civil de Caldas de Reis. 

Imaxe do accidente de Caldas de Reis. Foto: Emerxencias de Cuntis