Un accidente de tráfico en Moaña e outro en Salvaterra deixan dúas vítimas mortais
Un home morreu na AP-9 tras chocar unha furgoneta e un coche preto da ponte de Rande
Un motorista de 30 anos faleceu ao bater contra un turismo en Salvaterra de Miño
Dúas persoas morreron este sábado en senllos accidentes de tráfico. O primeiro rexistrouse arredor da unha e cuarto da madrugada na estrada PO-510 ao seu paso por Salvaterra de Miño.
A vítima é un motorista de 30 anos veciño de Vigo, que faleceu tras bater contra un coche que saíra fóra da vía. Cando chegaron os efectivos de emerxencia só puideron confirmar o seu falecemento.
Tras o sinistro, axentes da Garda civil localizaron o condutor do vehículo nun bar. Fixéronlle a proba de alcoholemia e deu positivo.
Estado no que quedou o coche accidentado en Moaña
Choque na AP-9
Horas máis tarde, sobre as oito da mañá, produciuse outro accidente en Moaña, no quilómetro 148 da AP-9, en dirección Pontevedra, moi preto da Ponte de Rande.
Un home morreu e outras tres persoas quedaron feridas na colisión entre un turismo e unha furgoneta, que debido á violencia do impacto envorcou, aínda que o seu condutor saíu ileso.
O estado no que quedou o turismo fixo que os bombeiros tiveran que excarcerar un dos seus ocupantes. O falecido é unha das persoas que viaxaban neste vehículo.
