Aparece morto un home que estaba pescando na parroquia de Beluso, en Bueu
O home, de 38 anos e veciño de Marín, apareceu no lugar da Roiba este domingo pola mañá
A vítima desaparecera pouco despois da unha da madrugada cando estaba pescando
Alertado o 112, púxose en marcha o operativo de busca: Salvamento Marítimo e a Garda Civil
O corpo sen vida dun home apareceu a primeira hora desta mañá de domingo no lugar da Roiba, na parroquia de Beluso do concello de Bueu. A vítima é un home de 38 anos e veciño de Marín, que desapareceu contra a unha da madrugada cando se atopaba pescando.
Un home deu a alarma pouco despois da unha da mañá. Avisaba de que había un home na auga e que se vía a luz dunha lanterna no fondo rochoso, nunha zona próxima ao peirao de Beluso e que tamén había outro en terra cun comportamento que lle parecía sospeitoso.
🔴#AXEGAInforma de que foi achado o corpo sen vida dunha persoa en Bueu.
— 112 Galicia (@112Galicia) December 21, 2025
📍 Praia de Beluso.
▶️ O corpo foi atopado por unha patrulla da Garda Civil.
▶️ Buscábase á persoa desde a 1:10h desta madrugada.
🚨 @salvamentogob, @GardacostasGal e @guardiacivil. pic.twitter.com/QkSUnAWDwM
Emerxencias de Galicia 112 mobilizou o equipo de busca. Foi mobilizado Salvamento Marítimo que puxo en marcha o helicóptero Pesca I, a lancha Salvamar Mirach cun mergullador e tamén a embarcación da Garda Civil Corvo Mariño. Tamén se dispuxeron medios terrestres da propia Garda Civil e de Protección Civil. Con todo, de noite foi imposible atopar o corpo e contra as catro da madrugada suspendeuse operativo ata que se fixese de día.
Esta mañá, xa coa luz do día, a patrulla da Garda Civil localizou desde terra o corpo do desaparecido.
