Dúas menores, feridas leves por un fallo nunha atracción das festas de San Froilán

Dúas menores quedaron feridas de carácter leve nunha atracción das festas de San Froilán, en Lugo, que experimentou un fallo a pasada noite, cando a barra do asento as golpeou cando estaban a bordo.

Era xa pola noite e dúas rapazas montaron nesta atracción do feiral. Ao empezar a funcionar, caeron ao chan, aparentemente debido a un fallo humano, xa que malia que levaban a barra protectora posta, non quedara fixada co pasador que reforza a seguridade, de xeito que sen esa caravilla reforzando a barra, esta abriuse e foi así como caeron as cativas.

Segundo as testemuñas, as rapazas non sufriran feridas de gravidade, pero foron levadas inmediatamente ao HULA para comprobar o alcance das mesmas e para que estiveran en observación.

Con todo, por precaución, pechouse a barraca e un enxeñeiro do Concello, outro enxeñeiro externo, o comisario do recinto e outros técnicos estiveron revisando a atracción para garantir que volva funcionar con seguridade.

Todas as barracas do recinto feiral, previo ao seu funcionamento, sométense a un estrito control e supervisión, tanto por parte de persoal do Concello como por empresas alleas para garantir o seu funcionamento correcto e a súa seguridade.

Con todo, este ano xa se produciron máis problemas dende que empezaron a funcionar o pasado 29 de setembro, xa que nesta semana unha muller rompeu unha perna noutra barraca distinta e un home bateu coa cara contra outra das atraccións, polo que tiveron que poñerlle puntos de sutura.