Dous mortos ao bater un helicóptero antiincendios contra outro en Grecia
Faleceron o piloto e o copiloto dun dos aparellos e os dous tripulantes do outro quedaron feridos leves
Os dous ocupantes dun helicóptero que loitaba contra o lume en Grecia morreron ao bater no aire con outro aparello antiincendios dirixido por dúas persoas que quedaron feridas leves.
Segundo a emisora Skai, faleceron un piloto romanés e un copiloto grego e os outros dous, das mesmas nacionalidades, foron trasladados a un centro hospitalario.
Varias canles ofreceron imaxes de como os dous aparellos voan moi preto ata que chocan e un deles incéndiase e perde a hélice principal, derrubándose sobre o chan.
As lapas preto de Agia Paraskevi. REUTERS/Stelios Misinas
Os aparellos, identificados como modelos Bell 124 por algúns medios, participaban nos labores de extinción dun lume en Psatha, unha localidade costeira a uns 60 quilómetros de Atenas.
Alugados polo Corpo de Bombeiros, engalaran do aeroporto militar de Elefsina, pero aínda non se sabe se os tripulantes gregos eran membros das Forzas Aéreas, que adoitan pilotar aeronaves de extinción.
O incendio declarado hai catro días na rexión de Beocia queimou xa preto de 10.000 hectáreas e obrigou a evacuar milleiros de persoas. A fronte oriental atópase este domingo a uns 35 quilómetros de Atenas.
O pasado mércores tres bombeiros morreron durante as tarefas de extinción de dous incendios na illa de Creta e no sur do Peloponeso, xa baixo control.
