Dous mortos ao bater un helicóptero antiincendios contra outro en Grecia
Faleceron o piloto e o copiloto dun dos aparellos e os dous tripulantes do outro quedaron feridos leves
Desde o luns declaráronse 220 incendios forestais no país e moitos propagáronse atizados polos forte vento
Os dous ocupantes dun helicóptero que loitaba contra o lume en Grecia morreron ao bater no aire con outro aparello antiincendios tripulado por dúas persoas que quedaron feridas leves.
Os falecidos son un piloto danés e un copiloto grego, segundo anunciou o primeiro ministro, o conservador Kyriakos Mitsotakis, nunha mensaxe na rede social X.
"Expreso o meu máis profundo pesar polo tráxico accidente dos dous helicópteros de extinción de incendios alugados que se cobrou a vida de dous combatentes en primeira liña na loita contra os incendios, baixo condicións meteorolóxicas moi adversas", manifestou.
Na zona onde se produciu o accidente, o vento sopra con refachos moi fortes que avivan o lume e dificultan as tarefas de extinción, sobre todo, para os medios aéreos.
Varias canles ofreceron imaxes de como os dous aparellos voan moi preto ata que chocan e un deles incéndiase e perde a hélice principal, derrubándose sobre o chan.
As lapas preto de Agia Paraskevi. REUTERS/Stelios Misinas
Os helicópteros, identificados como Bell 124 por algúns medios, tentaban sufocar un lume en Psatha, unha localidade costeira a uns 60 quilómetros de Atenas.
Alugados polo Corpo de Bombeiros, engalaran do aeroporto militar de Elefsina. Segundo a emisora Skai, a tripulación era persoal civil que traballa para empresas privadas.
Tras o choque, todas as aeronaves do mesmo modelo quedaron inmobilizadas ata novo aviso, de acordo co protocolo, nun momento en que o papel dos medios aéreos é crucial.
O pasado mércores tres bombeiros morreron durante as tarefas de extinción de dous incendios na illa de Creta e no sur do Peloponeso, xa baixo control.
Unhas 10.000 hectáreas en catro días
Este incendio declarado hai catro días na rexión de Beocia queimou xa preto de 10.000 hectáreas e obrigou a evacuar milleiros de persoas. A fronte oriental atópase este domingo a uns 35 quilómetros de Atenas.
Durante a tarde, os esforzos dos máis de 450 bombeiros con 126 camiones e doce avións e helicópteros cisterna que operan contra o lume concentrábanse preto das localidades de Agios Nektarios e Krio Pigadi, ameazadas polas lapas.
"Estamos a intentar salvar as vivendas e as infraestruturas do pobo (de Agios Nektarios)", sinalou á axencia estatal AMNA o alcalde do municipio de Mandra, Armodios Drikos.
Decenas de efectivos traballan tamén na illa grega de Cefalonia, no mar Xónico, onde este domingo se declarou outro lume que ameaza zonas poboadas.
Un helicóptero bota auga preto de Haidari. Reuters/Louiza Vradi.
Máis de 200 lumes e 33 detidos
Desde o pasado luns declaráronse en Grecia 220 incendios forestais, segundo o Corpo de Bombeiros, e moitos deles propagáronse atizados polos fortes ventos.
Nos últimos cinco días as forzas de seguridade detiveron trinta persoas acusadas de provocar lumes por neglixencia e imprudencia e outras tres de forma intencionada.
Dous dos detidos están vinculados cunha rede privada de transmisión de electricidade que non funcionou correctamente e xerou faíscas que provocaron o lume de Beocia.
Segundo o Observatorio Nacional de Atenas, entre 2017 e 2025 arderon en Ática 47.000 hectáreas de bosque, o 38 % do terreo forestal da rexión capitalina.
Os incendios forestais son recorrentes en Grecia. No ano 2023, as lapas queimaron 170.000 hectáreas (o 1,2 % do territorio) en Grecia, 95.000 delas no incendio de Evros, o peor rexistrado en Europa ata o momento.
