Dous feridos nunha pelexa a marteladas por tráfico drogas en Vilagarcía
Un dos feridos está ingresado en estado grave, o outro foi localizado con lesións tras fuxir do lugar
Dous homes quedaron feridos, un deles grave, en Vilagarcía de Arousa por unha pelexa con uso de martelo vinculada co tráfico de drogas.
A Policía Local recibiu o aviso ás 08:30 da mañá, aproximadamente, dunha persoa que alertaba dunha pelexa con instrumentos de ferraxería, apuntando a un martelo como posible peza empregada.
Dúas patrullas desprazáronse a Trabanca Badiña, en concreto na rúa da Pena. Alí atoparon, con abundante sangue, un home de 42 anos, precisaron en Urxencias Médicas 061. O home estaba tendido no chan convulsionando. Foi trasladado ao Hospital do Salnés polas emerxencias, que mobilizaron ao lugar un soporte de vital básico e outro de vital avanzado.
O outro implicado, tamén un home de mediana idade, fuxiu. Nas inmediacións localizouse o martelo. Posteriormente, tamén se deu co fuxido, que presentaba lesións e foi trasladado ao Hospital do Salnés, onde permanece custodiado pola Policía Nacional. Na Policía Local, vinculan o sucedido cun asunto de tráfico de drogas.
