Dous feridos graves nunha colisión entre un turismo e unha furgoneta en Mos
Unha persoa tivo que ser liberada polos bombeiros tras quedar atrapada no interior do seu vehículo
O condutor da furgoneta logrou saír polos seus propios medios, aínda que tamén precisou asistencia sanitaria
Dúas persoas quedaron feridas de gravidade nunha colisión frontal entre un turismo e unha furgoneta rexistrada este luns na estrada N-550, á altura do punto quilométrico 151, na parroquia de Louredo, no municipio pontevedrés de Mos.
Segundo informou o 112 Galicia, o accidente obrigou a mobilizar os servizos de emerxencia despois de que un particular alertase do sinistro e advertise de que era necesaria asistencia sanitaria e, posiblemente, a intervención dos bombeiros debido a que unha persoa permanecía atrapada.
Ao momento acudiron os bombeiros do Baixo Miño e os GES de Mos, que tiveron que excarcerar o ocupante do turismo, que quedara atrapado no interior do vehículo.
Pola súa banda, o condutor da furgoneta logrou saír polos seus propios medios, aínda que tamén precisou asistencia sanitaria.
De momento descoñécense as causas que provocaron esta colisión frontal, pero ata o lugar desprazáronse, alén dos servizos sanitarios e os bombeiros, a Garda Civil de Tráfico, que se fixo cargo da regulación da circulación e da investigación das causas do accidente.
