A Xunta regula o uso de maquinaria no período de alto risco de incendio
O regulamento obrigará a ter unha persoa de observador mentres se fan os traballos e contar con medidas de extinción das que poder botar man
A Consellería do Medio Rural publicou este luns unha orde para regular o uso de maquinaria no período de alto risco de incendio que obriga contado cunha serie de medidas de prevención para realizar traballos entre as 12:00 e as 18:00 horas do día.
A orde, publicada no Diario Oficial de Galicia (DOG), aplícase durante o período considerado de alto risco -do 1 de xullo ao 30 de setembro- e os días en que o índice de risco diario de incendio sexa moi alto ou extremo.
A nova normativa permite realizar actividades de carácter preventivo, silvícola ou agrícola con maquinaria en terreos forestais e as súas zonas de influencia eses días, pero cumprindo cunha serie de indicacións entre as 12:00 e as 18:00 horas.
Nesa franxa horaria, é obrigatorio contar cunha persoa que poida exercer de observador para que dea aviso aos servizos de emerxencia se detecta un posible conato.
Tamén será necesario dispoñer dun depósito de auga de polo menos 400 litros, un extintor de espuma con base de auga de polo menos 6 quilos, dous batelumes e unha mochila extintora de polo menos 15 litros.
"A través desta orde concrétase e desenvolve a normativa autonómica e estatal actual e búscase facilitar os traballos que sexa necesario seguir levando a cabo durante esta época, ao mesmo tempo que se proporciona maior seguridade e prevención nos mesmos ás persoas que empregan esta maquinaria", explica a Consellería.
Nos últimos dez anos, producíronse 411 incendios forestais ocasionados por maquinaria, dos cales preto do 60 % concentráronse na citada franxa horaria. A maiores destes incendios habería que sumar os non forestais, os agrícolas, que só en 2025 foron 30 entre o 1 de xullo e o 30 de setembro.
