As diferentes institucións galegas gardaron un minuto de silencio en memoria das vítimas tras o dobre terremoto de magnitudes 7,2 e 7,5 rexistrado na xornada do mércores (medianoite do xoves 25 na España peninsular e Baleares) en Venezuela.
A Xunta, o Parlamento de Galicia e concellos de toda a Comunidade, seguindo a convocatoria da Federación Española de Municipios e Provincias (FEMP) renderon este luns, ás 12.00 horas, unha homenaxe silenciosa ao pobo venezolano.
No concello pontevedrés de Marín, o acto foi especialmente emotivo e congregou a decenas de persoas debido a que unha familia de orixe venezolana residente no municipio, que se atopaba de viaxe no país latinoamericano, permanece desaparecida na Guaira.
Os desaparecidos son Yhosvany Hernández Fernández, Adela Taberneiro García e os seus fillos Ulises, de oito anos, e Lea, de nove. Todos eles viaxaron o sábado, día 20, a Venezuela e estaban a visitar a familiares na Guaira, concretamente na zona da praia Os Cocos, na localidade de Carballeda.
Trátase dunha familia moi coñecida e querida neste municipio xa que, en 2021, fundaron o Marinenses Hóckey Club, do que Yhosvany é adestrador e Adela, presidenta.
Por iso, nenos, novos e o claustro do Colexio A Inmaculada, onde están escolarizados os menores, acudiron ao acto, no que tamén participaron veciños venezolanos residentes no municipio.
A alcaldesa de Marín, María Ramallo, lamentou a traxedia, que o municipio pontevedrés "está a sentir de xeito especialmente duro". "A súa desaparición ten os corazóns da súa familia, persoas próximas e de todo Marín en vilo", sinalou a alcaldesa.
A continuación, mostrou a "solidariedade máxima" cos seus seres queridos e co resto das persoas que "están pendentes dos seus familiares ou que, desgraciadamente, perderon a alguén nesta traxedia absoluta".
"Marín está convosco e non deixaremos de facer todo o que estea na nosa man para axudar e achegar nun momento tan duro e delicado", remarcou a rexedora.
Algúns están tocados directamente polo infortunio:
"A miña familia non lle pasou nada, pero teño moitos amigos... Os de aquí de Marín eran amigos... son amigos meus, porque non perdemos a esperanza de que estén vivos, e non teño palabras", explican.
Arrepiante é o relato de Jennifer Peña:
"Gran parte da miña familia estaba nun dos edificios que se derrubou. Son 11 persoas, das que de 3 xa sacaron os corpos, pero estamos á espera dos outros 9".
Outra veciña de orixe venezolana insiste en que "hai que ter fe, porque aínda hai moita xente que está viva". Cinco días despois do tremor de terra, ninguén perde a esperanza.
Ao termo do acto, que finalizou cun aplauso, Joan Andrade, amigo da familia e tamén de orixe venezolana, lamentou a "traxedia moi fea" que sacudiu ao país e lembrou que ten "moitos compañeiros afectados".
"Á miña familia non lle pasou nada, pero teño moitos amigos que están afectados e temos esperanza de que estean vivos. Non teño palabras", expresou.
Xunta e Parlamento de Galicia
O Goberno galego, co presidente, Alfonso Rueda, e os conselleiros á fronte, xunto con outros cargos e traballadores do complexo administrativo de San Caetano, tamén gardaron un minuto de silencio ante o Edificio de Presidencia.
