Dous camións implicados en senllos accidentes en Vigo e Ames
Un camión envorcou tras golpear contra unha ponte en Bembrive
Outro camión envorcou e caeu por un terraplén duns 15 metros de altura no Milladoiro
Os condutores quedaron feridos leves
Aparatoso accidente dun camión esta mañá na parroquia viguesa de Bembrive. Ocorreu pouco antes das 8 e media, no quilómetro 13 da VG-20.
O camión que se dirixía cara a Vigo, levaba a caixa abatible levantada e ao pasar por debaixo dunha ponte quedou enganchado. Co impacto, o vehículo acabou envorcado na vía. Ao lugar do suceso trasladáronse urxencias médicas, a Policía Local, o Servizo de Mantemento de Estradas e a Garda Civil de Tráfico.
Como consecuencia do sinistro producíronse importantes retencións. O condutor do camión quedou ferido, pero o seu estado non reviste gravidade.
Non foi o único accidente de camión rexistrado hoxe nas estradas galegas.
No Milladoiro, no concello de Ames, outro camión envorcou e caeu por un terraplén duns 15 metros de altura. O condutor non sufriu feridas graves, malia a aparatosidade do sinistro.
Conducía pola AP-9 e saíu da vía pola marxe dereita. Varias árbores e o muro dunha casa frearon o vehículo e evitaron que as consecuencias fosen maiores.
